Navigar sin dossierpazient.ch

Mias infurmaziuns da sanadad. Il dretg mument al dretg lieu.

  • Il dossier electronic dal pazient (DEP) è ina collecziun persunala da documents davart Vossa sanadad. Tals documents èn per exempel ina radiografia, Voss attest da vaccinaziun, il recept per l’apoteca ubain il rapport d’extrada da l’ospital suenter Vossa ultima operaziun.

  • Il DEP tutga a Vus

    Las spezialistas ed ils spezialists da sanadad deponan quests documents en Voss DEP. Vus sez pudais medemamain arcunar en Voss DEP documents sco per exempel il recept per ils egliers, la disposiziun da la pazienta u dal pazient ubain las valurs da la pressiun dal sang. Tut questas infurmaziuns medicinalas, datas e documents tutgan a Vus – il DEP tutga a Vus.

Voss documents adina per mauns

Cun Voss DEP avais Vus adina per mauns las infurmaziuns da sanadad las pli impurtantas: sin Voss computer, sin Voss smartphone – a chasa, en gir ed a l’exteriur.

Sche Voss smartphone va a perder, n’èn Voss documents dentant betg pers. Quels n’èn numnadamain betg arcunads sin Voss apparat, mabain en moda segira tar Voss purschider dal DEP.

Vus n’essas betg obligada u obligà da posseder in DEP. Il DEP è facultativ per Vus.

Partai Voss documents

Vus decidais sez tge documents che tge spezialista u tge spezialist da sanadad po leger.

Cun il DEP avais Vus adina la survista da Voss documents e pudais metter a disposiziun Vossas infurmaziuns actualas da sanadad ad ulteriuras spezialistas ed ad ulteriurs spezialists da sanadad.

Na vulais Vus betg administrar sez Voss DEP? Questa incumbensa pudais Vus er surdar ad ina persuna da confidenza. Quai po esser Vossa amia u Voss ami, ina commembra u in commember da la famiglia ubain ina spezialista u in spezialist da sanadad sco per exempel Vossa media u Voss medi da chasa.

Quant segir è Voss DEP?

Tgi che arcuna u tgi che consultescha documents en Voss DEP – tut vegn protocollà automaticamain dal DEP. Uschia savais Vus adina tge che capita cun Voss documents en il dossier.

La Lescha federala davart il dossier electronic dal pazient (LDEP) prescriva co ch’il DEP sto esser organisà e segirà tecnicamain.

Mintga purschider dal DEP vegn examinà minuziusamain, certifitgà e controllà. Uschia vegni garantì ch’ils documents en il DEP èn protegids.

Ils purschiders dal DEP certifitgads èn segnads cun il label uffizial da segirezza:

Ultima modificaziun 26.02.2019