Navigar sin dossierpazient.ch

Las infurmaziuns da sanadad. Il dretg mument al dretg lieu.

Il dossier electronic dal pazient (DEP) è ina collecziun da documents da las pazientas e dals pazients. Quests documents cuntegnan infurmaziuns relevantas per il tractament sco per exempel il rapport d’extrada da l’ospital, il rapport da tgira da la spitex, radiografias, l’attest da vaccinaziun ubain il recept per l’apoteca. Las pazientas ed ils pazients pon arcunar en il DEP er atgnas infurmaziuns da sanadad sco per exempel il recept per ils egliers, la disposiziun da la pazienta u dal pazient ubain las valurs da la pressiun dal sang.

Voss pazient As conceda access

Vus pudais arcunar documents en il DEP da Vossas pazientas e da Voss pazients da tut temp e senza dretgs d’access.

Per pudair leger documents en il DEP duvrais Vus sco spezialista u spezialist da sanadad però in dretg d’access explicit. Quest dretg As vegn concedì da la pazienta u dal pazient.

Sulettamain en cas d’urgenza èsi pussaivel da consultar documents senza dretg d’access. La pazienta u il pazient sto alura vegnir infurmà davart l’access.

Las pazientas ed ils pazients pon incaricar ina persuna da confidenza d’administrar lur DEP en lur num. Quai po esser ina spezialista u in spezialist da sanadad, ina commembra u in commember da la famiglia ubain in’amia u in ami.

Uschia survegnis Vus access al DEP

L’access al DEP è pussaivel en differentas modas. U che Vus As annunziais sin in uschenumnà «portal d’access per spezialistas e spezialists da sanadad» u che Vus survegnis directamain access al DEP sur Vossa software existenta.

Independentamain da la soluziun tecnica restan ils documents originals tar Vus. En il DEP na vegnan arcunadas mo copias.

Sco spezialista u spezialist da sanadad survegnis Vus access a las infurmaziuns relevantas per il tractament da Vossas pazientas e da Voss pazients. Cun Voss agens documents pussibilitais Vus ad autras spezialistas ed ad auters spezialists da sanadad d’acceder ad infurmaziuns utilas en moda svelta e simpla.

Quant segir è il DEP?

Tgi che arcuna u tgi che consultescha documents en il DEP – tut vegn protocollà automaticamain dal DEP. Uschia san las pazientas ed ils pazients tge che capita cun lur documents en il dossier.

La Lescha federala davart il dossier electronic dal pazient (LDEP) prescriva co ch’il DEP sto esser organisà e segirà tecnicamain.

Mintga purschider dal DEP vegn examinà minuziusamain, certifitgà e controllà. Uschia vegni garantì ch’ils documents en il DEP èn protegids.

Ils purschiders dal DEP certifitgads èn segnads cun il label uffizial da segirezza:

Ultima modificaziun 26.02.2019